Vhubvo

Nyambedzano ya u thoma: 4 Ṱhangule 2025

Tshigwada tsha vharangaphanḓa vha bvaho kha zwitshavha zwo fhamba-fhambanaho zwa mvelele dza Afurika Tshipembe vho fara khuvhangano nga inthanethe nga ḽa 4 Ṱhangule 2025 u itela u ambedzana nga ha khonadzeo ya u shumisana u itela u lugiselela ḽiṅwalwa ḽa vhupfiwa ḽine ḽa nga ṋetshedzwa vhadzudzanyi vha Nyambedzano ya Lushaka. Ho dzhiiwa tsheo dzi tevhelaho nga tshifhinga tsha khuvhangano:

• Vharangaphanḓa vho tenda u shumisana u ṅwala ḽiṅwalwa ḽa vhupfiwa ḽa Nyambedzano ya Lushaka ḽine ḽa ḓo sumbedza mavhonele avho nga ha shango u bva kha mavhonele o khetheaho a zwitshavha zwa mvelele.
• Ḽiṅwalwa iḽi ḽa vhupfiwa ḽi ḓo ḓivhadzwa khagala phanḓa ha ḽa 15 Ṱhangule 2025.
• Vharangaphanḓa vho dovha vha tendelana u ḓivhadza nga ha maga a tshumisano (u shumisana ha zwitshavha zwa mvelele) ine ya vha na vhuḓifhinduleli ha u ṅwala ḽiṅwalwa ḽa vhupfiwa.
• Ho thomiwa tshigwada tsha u ṅwala ḽiṅwalwa ḽa mvetamveto ya vhupfiwa na u ṱanganedzwa nga vharangaphanḓa, ḽo thewaho kha vhupfiwa vhu bvaho kha vharangaphanḓa nga musi wa khuvhangano na nga murahu hayo.
• Enea maga a tshumisaho o vha o livhiswa kha vhumatshelo nahone ha kateli Nyambedzano ya Lushaka fhedzi.

Mveledziso

Nga murahu ha zwenezwo, tshigwada tsho ṱanganedza vhupfiwa vhu bvaho kha vharangaphanḓa nahone tsha sika ḽiṅwalwa ḽe ḽa ṱanganya vhupfiwa nga fhasi ha thero dzo ḓoweleaho dze dza topolwa. Nga ḽa 8 Ṱhangule 2025, madzangano ane a imela vharangaphanḓa vha kale o ḓivhadza uri a khou bva kha tshigwada tshine tsha khou lugiselela Nyambedzano ya Lushaka na Buthano ḽa u Thoma ḽa Lushaka ḽa Nyambedzano ya Lushaka ḽe ḽa vha ḽo dzudzanyelwa ḽa 15 Ṱhangule 2025.

Nyambedzano ya vhuvhili: 11 Ṱhangule 2025

Khuvhangano ye ya tevhela yo farwa nga vharangaphanḓa nga ḽa 11 Ṱhangule 2025 u itela u haseledza vhupfiwa he ha ṱanganedzwa, ḽiṅwalwa ḽa mvetamveto kathihi na maitele ane a tea u tevhelwa, ho sedzwa mveledziso. Ho dzhiiwa tsheo dzi tevhelaho nga tshifhinga tsha khuvhangano:

• Vharangaphanḓa vho tenda u bvela phanḓa vha tshi shumisana u ṅwala ḽiṅwalwa ḽine ḽa sumbedza khaedu khulwane dzo livhanaho na zwitshavha zwa mvelele shangoni, zwine na zwone zwa tea u rangiswa nga Nyambedzano ya Lushaka.
• Maga a tshumisanoa ḓo itwa lwa tshiofisi nga u sikwa na u ṱanganedzwa ha ḽiṅwalwa ḽa u thoma.
• Hu ḓo tevhelwa maitele a u fara khuvhangano nga kha inthanethe khathihi na nga ho livhaho u itela u swaledzela zwo bulwaho afho nṱha.
• Zwidodombedzwa zwi tshimbidzanaho na khuvhangano na maga ane a tea u dzhiiwa, hu tshi katelwa na nḓivhadzo dza tshitshavha na dza vhuhashi, zwi ḓo langwa nga tshigwada.

Mulaedza wa maanḓa

Enea maga a tshumisano a na mulaedza wa maanḓa wa uri zwitshavha zwa mvelele na vharangaphanḓa vhazwo – vhane maipfi avho a sa anzele u pfiwa – a vha khou hwala vhuḓifhinduleli na u dzhia maga nga u ambedzana u itela u vhuyedza mirafho ya zwino na ya tshifhingani tshi ḓaho.