Abaholi bemiphakathi yamasiko eyahlukahlukene kumele basebenze ngokuhlanganyela kule Nkulumompendulwano kaZwelonke nangale kwayo
Abaholi abahlukahlukene bemiphakathi yamasiko bavumelene ukwathatha isinyathelo esizobenza ukuba baxoxisane ngokuphusile ngokwethembana nangokubambisana ngezindaba ezithintana nabo ngqo. Inhloso yokuqala yalesi sinyathelo ukwenza umqulu wemibono uveze umnyombo wezinselelo ezibhekene nemiphakathi yamasiko kuphinde kuhlongozwe izisombululo zalezi zinselelo. Lo mqulu wemibono uzophinde uthunyelwe kule Nkulumompendulwano kaZwelonke.
Lesi sinyathelo sihlose ukuqinisekisa ikusasa elinokuthula nenqubekela phambili yazo zonke izingane zemiphakathi yamasiko yezwe. Umsebenzi wayo uqhubeka nangale kwale Nkulumompenduwano kaZwelonke. Ukuthathwa kwalesi sinyathelo kulandela ukuxoxisana kwabaholi ngalokho okungahle kube ukusebenzisana ngale Nkulumompendulwano kaZwelonke. Iqoqo lokusebenza selisunguliwe ukuba libhale umqulu wemibono ozogunyazwa ngabaholi nanokuba kwenganyelwe uhlelo lokwenza kube semthethweni lesi sinyathelo sokusebenzisana.
“Ukubakhona kwemiphakathi yamasiko kungokoqobo; INingizimu Afrika akuyona eyomuntu ngamunye nombuso kuphela. Abaholi nezinhlangano ezibeka izinkambiso, amagugu, ulimi, ukuzazi ngokwamasiko nemiphakathi yamasiko ayisisekelo sokuqonda nendlela yokusingatha umphakathi okumele kunakwe futhi kunikwe indawo yawo kuhambisane kanye nalabo noma umbuso obeka kube yisisekelo sohlaka lwemibono. Ukuze inkulumompendulwano ibe ngeyoqobo ngokunomqondo, izinhlanka zemibono yezakhamuzi eyahlukahlukene kumele zinakwe futhi zimbandakanywe. Kusemqoka ukuba kube nesikhala esanele esibekelwe ukuba kunakwe ukwehlukahlukana kwamasiko neminye imiphakathi eyisisekelo somphakathi wethu nanokuthi kumele ibambe iqhaza elikhulu ekunqumeni ngekusasa layo iphinde ibe nekushoyo ngezindaba eziyithintayo,” kusho uBarend Uys, onguSihlalo ngokuBambisana weqoqo lokusebenza.
“Abaholi bemiphakathi yamasiko bayamenywa baphinde bakhuthazwe ukujoyina lesi sinyathelo nanokuba bazocobelelana ngemibono yabo okuwumnyombo wezinselelo ezibhekene nemiphakathi yamasiko kanye nezisombululo zalezi zinselelo. Lezi zindaba kumele kube yimizamo okuzogxilwa kuzo ukuqinisekisa ikusasa elinokuthula nenqubekela phambili yemiphakathi ezweni, ngakho kumele kube okugxilwe kuko kulezi zinhlelo zeNkulumompendulwano kaZwelonke. Lesi sinyathelo sithumela umyalezo onqala emiphakathini yamasiko nakubaholi bayo – okungukuthi amazwi abo avamise ukungalalelwa – izithwese umthwalo nokuthatha isinyathelo ngokucobelelana ukuze kuzuze kube nokuhlalisana kwezizukulwane zamanje nezangomuso,” kuphetha iNkosi Langa Mavuso, uSihlalo ngokuBambisana weqoqo lokusebenza. Ulwazi ngomsebenzi wesinyathelo sokusebenzisana, okumbandakanya igalelo kule Nkulumompendulwano Yezwe, kuzotholakala lapha www.peoplesdialogue.org.za.