Vharangaphanḓa vha zwitshavha zwa mvelele dzi sa fani vha shumisana kha Nyambedzano ya Lushaka na nga murahu hayo

Vharangaphanḓa vha zwitshavha zwo fhambanaho zwa mvelele dza Afrika Tshipembe vho tendelana kha u vhumba tshumisano ine ya ḓo ita uri vha kone u ambedzana nga nḓila i pfalaho na nga u fulufhedzea na u shumisana kha mafhungo a ndeme ane a kwama vhathu vhoṱhe. Tshipikwa tsha u thoma tsha vhukando ndi u kuvhanganya ḽiṅwalwa ḽa vhupfiwa ḽine ḽa sumbedza khaedu khulwane dzo livhanaho na zwitshavha zwa mvelele, khathihi na thandululo dzo dzinginywaho dza khaedu idzi. Ḽiṅwalwa iḽi ḽa vhupfiwa ḽi ḓo dovha ḽa ṋetshedzwa vha re kha Nyambedzano ya Lushaka.

Ndivho ya tshumisano ndi u ita vhungoho ha uri vhana vhoṱhe vhane vha dzula kha zwitshavha zwa mvelele vha tshila nga mulalo nahone vha na vhumatshelo vhu bvelelaho. Mushumo wayo a u nga ḓo guma nga Nyambedzano ya Lushaka. Yeneyi tshumisano yo vhumbiwa nga murahu ha nyambedzano dza zwenezwino dze dza itwa na vharangaphanḓa nga ha khonadzeo ya u shumisana kha Nyambedzano ya Lushaka. Ho vhumbiwa tshigwada tshine tsha ḓo shuma u kuvhanganya ḽiṅwalwa ḽa vhupfiwa ḽine ḽa ḓo ṱanganedzwa nga vharangaphanḓa na u langa maitele ane a ḓo ita uri yeneyi tshumisano i vhe ya lwa mulayo.

“Ndi ngoho uri hu na zwitshavha zwa mvelele; Afurika Tshipembe a ḽo ngo vhumbiwa nga vhathu na muvhuso fhedzi. Vharangaphanḓa na madzangano ane a vhea sialala, vhufa, luambo, vhuḓiṱaluli ha mvelele na zwitshavha zwa mvelele sa zwithu zwa ndeme zwine zwa vha thusa u pfesesa na u amba na vhathu na vhone vha tea u ṱhonifhiwa na u katelwa u fana na vhathu vhane dzhia pfanelo dza vhathu na maitele a muvhuso zwi zwone zwithu zwa ndeme. U itela uri nyambedzano i vhe ya ndeme ngangoho, mahumbulele a vhadzulapo a sa fani na a vhaṅwe a tea u ḓivhiwa na u katelwa. Ndi zwa ndeme uri hu sikwe tshikhala tshihulwane u itela u ṱanganedza u fhambana ha mvelele na zwiṅwe zwitshavha zwine zwa vhumba mutheo wa tshitshavha tshashu na uri vha tea u ita mushumo wa ndeme kha u dzudzanya vhumatshelo havho na u bva mulomo kha mafhungo ane a vha kwama,” vha ralo Vho-Barend Uys, Mudzulatshidulo wa tshigwada tsha vhashumi.

“Vharangaphanḓa vha zwitshavha zwa mvelele vha khou rambiwa na u ṱuṱuwedzwa u ṱanganela kha vhukando uvhu na u kovha mavhonele avho nga ha khaedu khulwane dzo livhanaho na zwitshavha zwa mvelele na thandululo dzine dza nga vha hone dza u tandulula khaedu idzi. Enea mafhungo a tea u haseledzwa u khwaṱhisedza uri hu vha na vhumatshelo ha mulalo na vhu bvelelaho kha vhadzulapo vha shango nahone a tea u haseledzwa kha Nyambedzano ya Lushaka. Ndivho ya honovhu vhukando ha tshumisano ndi u rumela mulaedza wa maanḓa wa uri zwitshavha zwa mvelele na vharangaphanḓa vhazwo –vhane kanzhi maipfi avho a sa pfiwe — vha khou hwala vhuḓifhinduleli na u dzhia vhukando nga u ambedzana u itela uri hu vha na tshilisana nga mulalo ha mirafho ya zwino na ya tshifhingani tshi ḓaho,” vha phetha nga u ralo Vho-Nkosi Langa Mavuso, Mudzulatshidulo wa tshigwada tsha vhashumi.

Mafhungo nga ha mushumo wa maga a tshumisano, hu tshi katelwa na vhupfiwa kha Nyambedzano ya Lushaka, a ḓo wanala kha www.peoplesdialogue.org.za.